متيم ...وشوقي اليك ..

متيم حد خراج الروح ..
وشوقي أليك ..
عناوين من كتاب مفتوح ..
تعالي معاي ..
نريّس في الروابي الدوح ..
ونتمهد ..
عشان تعهد ..
عليك الروح ..
وإما ..
تعالي نتشهد ..
ونتنهد ..
نبادر بي غرامنا نبوح ..
ونمحي الصد ..
حواجز بالحنين تتهد ..
وضيقة تروح ..
وحيل بجهد ..
غرام بشهد ..
أكيد مشهد ..
بطيب في الحنايا جروح ..
دحين يتضارى حُبنا كيف !؟

وكيف نرتاح ..
مدام كل الخلوق راجين ..
ومستنين ..
جوابك يوصل المٌداح ..
حبيبك ..
بسقي فيك الفال ..
عشم تربال ..
بحنس زهرة التفاح ..
تخضر في مروجوا سريع
عشان لمن يجنا ربيع
يلاقي نسيم عبيرك فاح
وانا اتكلمت بيك للناس
وشحتفت بكلامي عيون
حتبسم لو خيالك لاح ..
فضلت وفضلوا مستنين ..
وشمتانين
أتاري عشم وصولك راح ..
رجيناك في الربيع غبتي ..
وتجينا تطلي عز الصيف ..
دحين يتضارى حُبنا كيف !؟

من العٌزال
وقت متربصين سيرتك
دوام الحال
بيحسدوا فيك
وديمة عليك
كلام بتقال
وانتي هناك
سعادة وفال
وراحة بال
ف ليه قایلة
الملمة محال !؟
غيابك
مهما كان ترحال
وكان مهموم قليبك بي
كفاك
تطريني بي مرسال

بوصيك في المواني هناك
من البتشاف مع الرقة
واذا ضجة الحنين جواك
اكيد ضي الرجوع بقة
خشم باب الفريق راجيك
تجي ومفتاح سعادتو معاك
عشان تدي القلوب طقة
وتفتحي بي لقاك نفاج
يسكت كل لسان شمت
على طول غربتك نقة
فترجعي بالسلامة هناي
نقابلك في الفريق باكر
عقب تدي الغياب دقة